Ukrayna ABŞ və Rusiya ilə danışıqlara başlaya bilər | Zelenskidən açıqlama - Baku TV

Ukrayna Prezidenti Volodimir Zelenski ölkəsinin ABŞ və Rusiya ilə üçtərəfli danışıqların bərpasında maraqlı olduğunu bildirib.

O qeyd edib ki, Ukrayna istənilən vaxt və istənilən formatda belə görüşlərdə iştirak etməyə hazırdır.

Zelenskinin sözlərinə görə, artıq Ukrayna və ABŞ nümayəndələri arasında əlaqələr davam edir, tərəflər mütəmadi şəkildə ünsiyyət saxlayır.

Prezident əlavə edib ki, əsas məqsəd müharibəyə son qoyacaq diplomatik prosesin yenidən işə salınmasıdır.

O bildirib ki, danışıqların harada və nə vaxt keçiriləcəyi Ukraynadan asılı deyil, lakin daha əvvəl bu cür görüşlərə ev sahibliyi etmiş ölkələr prioritet hesab olunur.

Zelenski həmçinin Türkiyənin belə görüşlər üçün hazır olduğunu vurğulayıb və Yaxın Şərq regionunun da atəşkəs şəraitində təhlükəsiz platforma ola biləcəyini qeyd edib.

Bundan əlavə verilən məlumata görə, Ukrayna və ABŞ nümayəndələri artıq son günlərdə danışıqlar aparıblar. Buna baxmayaraq, Vaşinqtonun eyni vaxtda digər beynəlxalq böhranlarla, o cümlədən İranla bağlı vəziyyətlə məşğul olması fonunda Kiyev Rusiya ilə üçtərəfli sülh danışıqlarını yenidən canlandırmağa çalışır.