Ukrayna Ali Radasında gərginlik | Poroşenko özündən çıxdı, deputatlar isə...

Ukraynanın keçmiş prezidenti, “Avropa Həmrəyliyi” partiyasının sədri, deputat Petro Poroşenkonun 6 ay müddətinə parlamentə girişinə qadağa qoyula bilər.

Belə bir təşəbbüslə Ukrayna Ali Radasında hakim “Xalqın xidmətçisi” partiyasının deputatları çıxış edib. Təklif hakim partiyanın parlamentdə fraksiya rəhbəri David Araxamiya tərəfindən irəli sürülüb. Müvafiq komitə artıq təşəbbüsü təsdiqləyib və məsələni plenar iclasa yekun qərara yönləndirib. Buna etiraz edən “Avropa Həmrəyliyi” partiyasının deputatları təklifi antidemokratik adlandıraraq D.Araxamiyanı sərt tənqid ediblər.

Petro Poroşenko isə hakimiyyəti Ukraynada demokratiyanı məhv etməkdə günahlandırıb.

“İki həftədir ki, Kremlin “xidmətçiləri” Ukrayna parlamentində hakim partiya adı altında və beşinci kolonun üzvlərinin birgə səyi ilə məni 6 aylıq Ali Radanın iclasından məhrum etmək istəyirlər. Komitə iclasında birgə səsvermə ilə artıq bunu təsdiq də ediblər. Kimlərinsə göstərişi ilə məni Ukrayna Ali Radasından – xalqın tribunasında məhrum etməyi düşünür, parlament iclaslarında iştirakdan kənarlaşdırmağa çalışırlar. Mən də Avropa Həmrəyliyi partiyası olaraq, sizin hər biriniz kimi xalq tərəfindən seçilmişəm və gələcək taleyimizi yalnız xalq müəyyən etməlidir, hansısa deputatların qərarı yox. Hörmətli hakimiyyət, siz müxalifətə hücum etməklə ölkəni, müharibə vaxtı ordunu ruhdan salırsınız.

Siz artıq düşməni məğlub etmisiniz, qalıb müxalifət? Siz artıq müxalifəti, demokratiyanı məhv etmək qabiliyyətinə sahiblənibsiniz? Ötən həftə Brüssel və Vaşinqtonda sizə deyilənlərə qulaq asın – müharibə zamanı məhdudiyyətləri azaldın, müxalifəti danışıqlar prosesinə cəlb edin.

Siz müxalifətin qarşısını kəsməyi, dövlətin xarici siyasətini cəmi 5 idarəçi ilə formalaşdırmağı, müdafiəni, beynəlxalq siyasəti dağıtmağı planlaşdırırsınız. Bu, mənə genişmiqyaslı müharibəyə qədər olan günləri xatırladır. Siz – hakimiyyət dərslərdən nəticə çıxarmırsınız”, – Petro Poroşenko bildirib.

Ardınca Petro Poroşenkonun rəhbərlik etdiyi “Avropa Həmrəyliyi” partiyasından deputatlar hakim “Xalqın xidmətçisi” fraksiyasının parlamentdə fraksiya rəhbəri deputat David Araxamiyaya qarşı məhdudiyyətlər tələb ediblər. Onlar D.Araxamiyanı qeyri-adekvat davranışlarda ittiham edərək, Ali Rada rəhbərliyindən 6 ay müddətinə onun parlamentə girişinə məhdudiyyət qoymağı tələb ediblər. Lakin parlament rəhbərliyi müxalif deputatların təşəbbüsünü dəstəkləməyib.