Ukrayna danışıqlarında yeni mərhələ | Trampdan vacib açıqlama

ABŞ nümayəndələri dekabrın 13-də Avropada keçiriləcək Ukrayna üzrə görüşdə iştirak edə bilərlər.

Bu barədə ABŞ Prezidenti Donald Tramp Ağ Evdə jurnalistlərin suallarını cavablandırarkən bildirib.

"Onlar bizim iştirak etməyimizi istəyirlər. Nəticə əldə etmək üçün yaxşı şansımız olduğunu düşünsək, şənbə günü Avropadakı görüşdə iştirak edəcəyik. Biz çox vaxt itirmək istəmirik və münaqişəni nizama salmaq istəyirik", – deyə o bildirib.

Tramp həmçinin Vaşinqtonun Rusiya və Çinlə nüvəsizləşdirmə məsələlərini müzakirə etdiyini açıqlayıb. O, hər üç tərəfin bu məsələdə maraqlı olduğunu vurğulayıb.

"Mən nüvə silahından danışıram. Biz bunu Çinlə müzakirə etdik, mən bu barədə Rusiya ilə danışdım. Düşünürəm ki, bu bizim hər üçümüzün istədiyi bir şeydir", – deyə o qeyd edib.

Tramp həmçinin İranla olan münasibətlərindən danışıb.

"İran nüvə proqramını davam etdirməyə cəhd edə bilər. Onların bərpasına çox vaxt lazım gələcək, lakin əgər onlar bizimlə razılıq əldə etmədən onu bərpa etmək istəsələr, biz onu da məhv edəcəyik. Onların raketlərini çox tez məhv edə bilərik", – deyə ABŞ Prezidenti çıxışını yekunlaşdırıb.