Ukrayna dronları Rusiya səmasında vuruldu

Ukrayna Silahlı Qüvvələri iyulun 4-də səhər saatlarında Rusiyanın paytaxtı Moskva şəhərinin Yeni Moskva rayonuna 5 PUA ilə hücum edib.

Bu barədə Rusiya Müdafiə Nazirliyindən məlumat verilib. Bildirilib ki, hücum Vnukovo Hava Limanı yaxınlığında yerləşən hərbi hissəyə və aviabazaya edilib. Bütün dronlar təyyarə tipli olub və səhər tezdən Moskvaya doğru hərəkət edib.

Rusiya Fövqəladə Hallar Xidmətindən isə bildirilib ki, PUA-ların hamısı hava hücumundan müdafiə vasitələri ilə vurulub. Onlardan birinin qalıqlarının düşdüyü tikilidə yanğın olub. Hadisə nəticəsində insan tələfatı olmayıb.

Təhlükəsizlik məqsədilə uçuşların bir hissəsi digər hava limanlarına yönləndirilib. Bir neçə saat sonra isə hücumla əlaqədar hava limanının fəaliyyətində tətbiq olunan məhdudiyyət aradan qaldırılıb. Aeroport hazırda adi iş rejimində işləyir.

Rusiya Xarici İşlər Nazirliyinin rəsmi nümayəndəsi Mariya Zaxarova isə Moskvaya dronlarla hücum cəhdini Kiyev rejiminin növbəti terror aktı adlandırıb, bunda Qərb dövlətlərini günahlandırıb. O, BMT Təhlükəsizlik Şurasının üzvü olan ABŞ, Böyük Britaniya və Fransanı terroru maliyyələşdirməkdə ittiham edib.