Ukrayna lideri Krım tatarları ilə bağlı Ərdoğana müraciət edib

Ukrayna Prezidenti Volodimir Zelenski türkiyəli həmkarı Rəcəb Tayyib Ərdoğana Rusiya tərəfindən həbs edilən Krım tatarlarının siyahısını verib.

Bu barədə Ukrayna Prezidenti İstanbulda Ərdoğanla baş tutan mətbuat konfransında deyib.

O qeyd edib ki, həbs edilən tatarların sayı getdikcə artır və hələ də onların Ukraynaya dönmələri üçün səylər nəticə verməyib. Zelenski Türkiyə liderinin bu məsələdə yardım edə biləcəyinə ümid etdiyini vurğulayıb.

Rəcəb Tayyib Ərdoğan isə öz növbəsində Ukrayna ilə Rusiya arasında əsir mübadiləsi məsələsində kömək etməyə hazır olduğunu deyib.

Volodimir Zelenski isə əlavə edib ki, Kiyev və Ankara müdafiə sektorunda birgə layihələrə dair hökumət və şirkətlər səviyyəsində razılıq əldə ediblər.

“Biz müzakirə etdiyimiz layihələri həyata keçirmək üçün mümkün qədər tez hərəkət etməyə hazırıq”, – deyə Ukrayna lideri bildirib.