Ukrayna müharibəsinin son 1010 günündə nələr yaşanıb?

Son 1010 gün ərzində Rusiya Ukraynanın ümumi ərazisinin 1 faizindən azını ələ keçirib.

Bunu monitorinq layihəsi “DeepState”in analitikləri bildiriblər.

Vurğulanıb ki, bu müddət ərzində təxminən 5,8 min kvadratkilometr Ukrayna torpağı Rusiyanın nəzarətinə keçib.

Məlumata görə, 12 noyabr 2022-ci ildə Rusiya tərəfindən işğal edilən ərazi 108 651 kvadratkilometr təşkil edirdisə, hazırda bu rəqəm 114 493 kvadrat kilometrdir. Yəni son dövrdə Rusiya əlavə 5 842 kvadratkilometr ərazini ələ keçirib. Bu isə Ukraynanın beynəlxalq səviyyədə tanınmış ərazisinin cəmi 0,96 faizinə bərabərdir.

“DeepState”in qeyd etdiyi kimi, Rusiya qüvvələri əsasən müharibənin ilk günlərində irəliləyiş əldə ediblər. Lakin Ukrayna Ordusunun şimal istiqamətində, həmçinin Xarkov və Xerson bölgələrində həyata keçirdiyi əks-hücum əməliyyatları nəticəsində işğal edilmiş ərazilərin böyük hissəsi geri qaytarılıb.

Buna baxmayaraq, 2022-ci ilin noyabrından sonra da Rusiya hücumlarını davam etdirib. Xüsusən də 2022-ci ilin payızında Baxmut istiqamətində ağır döyüşlər gedib.

“Ümid edirik ki, bu rəqəmlər ABŞ tərəfdaşlarımıza da çatacaq, çünki görünür, onların hesablamalarında müəyyən uyğunsuzluqlar var”, – deyə “DeepState” analitikləri əlavə ediblər.