Ukrayna neçə yaşayış məntəqəsini nəzarətə götürdü? | Rusiyada son vəziyyət

"Hazırda Kurskun 28 yaşayış məntəqəsi Ukrayna hərbçilərinin nəzarətindədir".

Bu barədə Kursk vilayətinin qubernatoru vəzifəsinin müvəqqəti icraçısı Aleksey Smirnov ölkənin Ukrayna ilə həmsərhəd bölgələrində vəziyyətlə bağlı keçirilən müşavirə zamanı Prezident Vladimir Putinə məruzə edib.

"Hazırda regionda vəziyyət ağırdır. Artıq 28 yaşayış məntəqəsi Ukraynanın nəzarətindədir. 2 000-ə yaxın insan var ki, hakimiyyət orqanları onların taleyindən xəbərsizdir.

Həmçinin bölgədə təxliyə ediləcək 180 000 insan var, 121 000 nəfər isə oranı tərk edib və oradan çıxarılıb. Ukrayna tərəfindən raket və PUA-larla hücumlar dayanmadan artır, Rusiyaya yönələn 194 PUA və raketlərdən 147-si zərərsizləşdirilib”, – deyə A.Smirnov bildirib.

A.Smirnov eyni zamanda vurğulayıb ki, Ukraynanın hücumları nəticəsində 12 mülki şəxs həlak olub, 10-u uşaq olmaqla 120-dən çox insan yaralanıb. O, əlavə edib ki, bölgədə Rusiya vətəndaşlığı sənədləri ilə təxribat qrupları fəaliyyət göstərir.