Ukrayna ordusu döyüşlərdə uğursuzluğa uğramağa başlayıb

Ukraynanın mövqelərində ölkənin bütün cəbhə və vilayətlərində gedən döyüşlərin və hava zərbələrinin güclənməsi fonunda geriləmə müşahidə olunur.

Bu barədə yerli mediada məlumatlar yayılıb. Qeyd olunub ki, buna səbəb Qərbin Kiyevə ayırdığı yardımların gecikməsidir. Bu da Rusiyaya bölgədə uğur qazanmasına zəmin yaradıb. Hətta Ukrayna Silahlı Qüvvələrinin Baş komandanı Oleksandr Sırski də etiraf edib ki, Moskva bir neçə istiqamətdə taktiki cəhətdən irəliləyib.

Avropada da ciddi müzakirələrə səbəb olan bu hadisə ilə bağlı ukraynalı hərbi ekspertlər də açıqlama veriblər.

Vladislav Voloşin qeyd edib ki, bir neçə yaşayış məntəqəsinə nəzarətin bərpa edilməsini uğur adlandırmaq düzgün olmasa da, Ukrayna ordusunun uğursuzluğudur.

“Uğursuzluğun səbəbi sadəcə ondadır ki, Ukrayna ordusu müttəfiqlər, xüsusən də ABŞ və Avropa İttifaqı tərəfindən lazımi dəstəyi ala bilməyib. Belə yardımlar vaxtında tam həcmdə edilsəydi, Rusiya heç bir uğur əldə edə bilməzdi. Əminliklə deyə bilərəm ki, zəruri silahlar verilərsə, qısa zaman kəsiyində itirilən mövqeləri geri qaytara və hərbi kampaniyanın gedişini tamamilə başqa istiqamətə yönəldə bilərik”, – deyə hərbi ekspert bildirib.