Ukrayna Ordusu Kremli hədəf alacaq?

Ukraynanın uzaqmənzilli raket və ya yeni dronlarla Kremli hədəf ala biləcəyi anons edilir.

Baku TV-nin Şərqi Avropa bürosu dolaşan informasiya ilə bağlı Ukrayna Silahlı Qüvvələrinin Baş Qərargah rəisinin sabiq müavini general-leytenant İqor Romanenkodan müsahibə alıb.

Onun fikrincə, uzaqmənzilli raketlərdən istifadəyə icazə verilsə də, birbaşa Kremli vurmaq asan olmayacaq.

“Ruslar Moskva ətrafında hava zərbələrindən ən güclü müdafiə sistemini yaradıblar. Radioelektron blok etmə vasitələrindən, qırıcı təyyarələrdən də istifadə edirlər. Son vaxtlar isə pilotsuz aparatlarla işləyən vertolyot dəstələri istifadədədir. Buna görə də bu müdafiə sistemindən keçmək və Moskva ərazisindəki obyektlərə çatmaq üçün kifayət qədər güclü hava zərbə vasitələri qrupu toplamaq lazımdır”, – deyə o bildirib.

Hərbi birləşmə komandanı İvan Timoçko isə mövzu ilə bağlı qeyd edib ki, hər şey bu raketlərin taktiki-texniki xüsusiyyətlərindən və uçuş radiusundan asılı olacaq:

“Əgər bu ixrac versiyası olacaqsa, çox güman ki, 300 kilometrə qədər radiuslu raketlər veriləcək. Bu raketlər Moskvaya çatmağa qadir deyil. Moskva xaricində kifayət qədər hədəf var. Kreml simvolik bir obyektdir. Biz hamımız çox yaxşı bilirik ki, hava hücumları zamanı Putin bunkerdə gizlənir. Həmin bunkerlər raketlərin də zərbələrinə tab gətirə bilir”.