Ukrayna Ordusu Pokrovskda Rusiya kəşfiyyatçılarını məhv edib

Rusiya Ordusu Donetskin Lenino yaşayış məntəqəsini ələ keçirib. Əməliyyatı “Mərkəz” hərbi qruplaşması reallaşdırıb.

Məlumatı Rusiyanın Müdafiə Nazirliyi yayıb.

Rusiya Ordusu Pokrovska da hücumları davam etdirir. Ukrayna Silahlı Qüvvələri həmin ərazidə müdafiəni gücləndirir. Pokrovskun mərkəzinə daxil olan Rusiyanın kəşfiyyat-diversiya qrupu bir neçə dinc sakini öldürüb. Hücum şəhərin dəmiryol vağzalı olan rayonunda qeydə alınıb. Ulkrayna Silahlı Qüvvələrinin hücum-axtarış qrupu Rusiyanın kəşfiyyatçılarının izinə düşərək onları məhv edib.

O ki qaldı hazırkı təmas xətti boyunca Ukrayna Prezidenti Volodimir Zelenskinin danışıqlar çağırışına, Kremlin sözçüsü Dmitri Peskov bildirib ki, Kiyevdən ziddiyyətli bəyanatlar verilir:

“Bu isə sülh prosesinə xidmət etmir. Rusiya Prezidenti Vladimir Putinin mövqeyi hamıya bəllidir. Ukraynadakı münaqişənin nizamlanması istiqamətində ABŞ ilə danışıqlar aparılır”.

Peskov ABŞ-nin “Tomahawk” raketlərinin Ukraynaya çatdırılması məsələsinə də toxunub və qeyd edib ki, Moskvaya bu barədə Vaşinqtondan heç bir rəsmi bildiriş daxil olmayıb.

Rusiya Xarici İşlər Nazirliyinin rəsmi nümayəndəsi Mariya Zaxarova da “Tomahawk” raketləri barədə danışıb. Onun sözlərinə görə, bu uzaqmənzilli raketlərin Ukraynaya çatdırılması yolverilməzdir.