Ukrayna Ordusu PUA-larla hücuma keçdi | Rusiya hava məkanında qorxulu anlar

Ukrayna Silahlı Qüvvələri fevralın 25-dən 26-na keçən gecə pilotsuz uçuş aparatları ilə 2025-ci ilin əvvəlindən bəri Rusiyaya kütləvi hücumunu həyata keçirib.

Bu barədə Rusiya Müdafiə Nazirliyi məlumat verib.

Bildirilib ki, Hava Hücumundan Müdafiə qüvvələri gecə ərzində 128 Ukrayna PUA-sını məhv edib.

Rusiya Hərbi İdarəsinin məlumatına görə, 2025-ci ilin əvvəlində, yanvarın 24-də də oxşar kütləvi hücum baş verib. Həmin gün Hava Hücumundan Müdafiə sistemləri Ukraynaya məxsus 121 PUA-nı vurub.

Məlumat üçün bildirək ki, 2024-cü ildə Ukrayna Rusiyanın hərbi əməliyyat zonasına daxil olmayan 35 regionuna təyyarə tipli 7345 PUA ilə hücum edib. Ölkənin Müdafiə Nazirliyinin məlumatına əsasən, PUA-ların əksəriyyəti – 1896-sı Belqorod ərazisində, 1206-sı Bryanskda, 1170-i isə Kurskda məhv edilib. Qeyd edək ki, Rusiya Silahlı Qüvvələri də gecə ərzində bir neçə dəfə Ukraynanın Kiyev vilayətini atəşə tutub. İlkin məlumata görə, hücum nəticəsində 1 nəfər ölüb, iki nəfər yaralanıb.