Ukrayna Ordusu Rusiyanı dayandırıb | Zelenskidən müharibə açıqlaması

Ukrayna Prezidenti Volodimir Zelenski Rusiya ilə müharibənin dalana dirəndiyini açıqlayıb.

Ölkə başçısı İtaliyanın “TG1” televiziyasına müsahibəsi zamanı münaqişədəki durğunluğa səbəbin silah tədarükünün gecikməsi olduğunu bildirib.

“Bu gecikmələr ciddi səhvlərlə nəticələnə bilər. Biz dünyanın ən güclü ordularından birinə sahib olan ölkə ilə mübarizə aparırıq. Amma əlimizdə olan sursatlar bizə kifayət etmir, daha müasir texnikaya ehtiyacımız var”, – deyə Zelenski qeyd edib.

Prezidentin sözlərinə görə, iki il ərzində vacib məqam Ukraynanı müdafiə edə bilməkdir. Ölkənin təxminən 26 faizinin hələ də işğal altında olduğunu deyən Zelenski bildirib ki, Rusiya ordusu nəzərəçarpan irəliləyiş əldə edə bilmir. Çünki ölkəsi onları dayandırıb.

Ukraynalı lider Rusiyanın münaqişə başlayandan indiyədək çox sayda gəmi itirdiyini əlavə edib.

Kiyevin isə Qara dənizdə taxıl dəhlizi yaratmağa nail olması iqtisadiyyata müsbət təsir edib.

Volodimir Zelenski onu da deyib ki, Rusiya ordusu artıq irimiqyaslı hücum edə bilmir və demək olar ki, dayandırılıb.