Ukrayna pilotsuz uçuş aparatları Rusiyanın kimya zavoduna zərbələr endirib - Baku TV

Ukrayna pilotsuz uçuş aparatları Rusiyanın Tula vilayətində yerləşən “Novomoskovsk Azot” kimya zavoduna zərbə endirib.

Bu barədə UNIAN Rusiya mənbələrinə istinadən məlumat yayıb.

Bildirilib ki, hücum nəticəsində müəssisənin ərazisində yanğın baş verib. Yerli sakinlər bir neçə partlayış səsi eşitdiklərini deyiblər. Tula vilayətinin qubernatoru faktı təsdiqləyib.

Vurğulanıb ki, “Novomoskovsk Azot” Rusiyanın ən iri kimya müəssisələrindən biridir. Zavod ammonyak, azot gübrələri, metanol, xlor, azot turşusu və digər kimyəvi məhsullar istehsal edir.

İlkin məlumata əsasən, hadisə nəticəsində ölən olmayıb, iki nəfər xəsarət alıb.

Qeyd edək ki, bu, “Novomoskovsk Azot” zavoduna edilən ilk hücum deyil. Daha əvvəl də müəssisənin dron hücumlarına məruz qaldığı və fəaliyyətinin müvəqqəti dayandırıldığı diqqətə çatdırılıb.

Bundan başqa, Rusiyanın Hava Hücumundan Müdafiə sistemləri Moskvaya doğru uçan dörd pilotsuz uçuş aparatının hücumunun qarşısını alıb.

Moskva meri Sergey Sobyaninin sözlərinə görə, Hava Hücumundan Müdafiə qüvvələri paytaxta istiqamətlənən dörd PUA-nı məhv edib. Hadisə ilə bağlı əlavə məlumat açıqlanmayıb.