Ukrayna Prezidenti telefon danışığının detallarını açıqladı

Ukrayna Prezidenti Volodimir Zelenski “X”dəki hesabında paylaşım edib.

O, ABŞ Prezidenti Donald Trampla olan telefon danışığının detallarına toxunub.

“Məzmunlu bir söhbət oldu. Biz sülh əldə etmək imkanları haqqında danışdıq, komanda səviyyəsində birlikdə işləməyə hazırlığımızı və Ukraynanın texnoloji imkanlarını, o cümlədən pilotsuz uçuş aparatları və digər qabaqcıl sahələri müzakirə etdik. Prezident Trampa birlikdə işləməyə olan marağı üçün minnətdaram”, – deyə Zelenski yazıb.

O həmçinin ABŞ lideri ilə təhlükəsizlik, iqtisadi əməkdaşlıq və resurs tərəfdaşlığı ilə bağlı yeni bir sənəd müzakirə etdiyini bildirib.

“Prezident Tramp Putinlə söhbətinin detallarını bölüşdü. Heç kim Ukraynadan daha çox sülh istəmir. ABŞ ilə birlikdə Rusiyanın təcavüzünü dayandırmaq və möhkəm, etibarlı sülh təmin etmək üçün növbəti addımlarımızı planlaşdırırıq. Biz bundan sonra da əlaqə saxlayacağımız və qarşıdan gələn görüşləri planlaşdıracağımız barədə razılığa gəldik”, – deyə Zelenski paylaşımında vurğulayıb.