Ukrayna rəsmisi hədəfləri və silahları açıqladı

Son günlər Ukraynada gedən müharibə nəticəsində vəziyyətin daha da gərginləşməsi Rusiyanın yeni ərazilərin işğalı ilə bağlıdır. Ukraynanın qış aylarında əks-hücum əməliyyatlarını səngitməsi, Qərbdən gözlənilən yeni silahlar, Rusiyanın növbəti genişmiqyaslı hücumu və bu kimi digər məsələlər hazırda müzakirə mövzusudur.

Ukrayna Təhlükəsizlik və Müdafiə Şurasının katibi Oleksey Danilov sözügedən məsələlərə Baku TV-nin Şərqi Avropa bürosuna müsahibəsində aydınlıq gətirib.

“Fevralın 24-ü ölkəmizə qarşı açıq hücumun başlanmasının ildönümü olduğundan, onlar həmin tarixədək cəbhədə hansısa uğurlar əldə etməyə çalışacaqlar. Hazırda xalqın qarşısında hesabat vermək üçün onların bu cür uğurları yoxdur. Biz hər şeyə hazırıq”, - deyə o bildirib.

O. Danilov qarşı tərəfin gözlənilən hücumları fonunda Ukraynanın Rusiyada hansı obyektləri hədəf ala biləcəklərini də açıqlayıb: “Xarkov şəhəri Rusiya ərazisindən S-300-lərlə mütəmadi olaraq atəşə tutulur. Sizcə, Rusiya ərazisində yerləşən bu sistemləri məhv etmək hüququmuz var, ya yox? Təbii ki, var. Biz bunu Qərbin silahı ilə deyil, hazırda arsenalımızda olan öz silahlarımızla edəcəyik”.