Ukrayna Rusiyanın dron idarəetmə məntəqəsini və neft bazasını vurdu

Ukraynanın Müdafiə Qüvvələri rusların dronların idarə edilməsi üzrə məntəqəsinə, neft bazasına, həmçinin düşmənin canlı qüvvəsinin cəmləşdiyi bir neçə mövqeyə zərbələr endirib.

Bu barədə Ukrayna Silahlı Qüvvələri Baş Qərargahının “Telegram” kanalında məlumat yayılıb.

Qeyd olunub ki, Ukrayna Silahlı Qüvvələrinin bölmələri Donetsk vilayətində Velikaya Novoselka rayonu yaxınlığında düşmənin canlı qüvvəsinin cəmləşdiyi yerə və dronların idarəetmə məntəqəsinə zərbələr endirib. Həmçinin Şaxmatnoye və Qriqoryevka rayonlarında rus hərbçilərinin toplaşdığı əraziləri vurub.

Ukrayna Ordusu Luqansk vilayətinin Nijnyaya Duvanka rayonunda Rusiya Federasiyasının sursat anbarına, Qulyaypole rayonu ətrafında düşmənin canlı qüvvəsinə və Dnepropetrovsk vilayətinin Berezovoye yaşayış məntəqəsi yaxınlığında batalyonun idarəetmə məntəqəsinə də hücum ediblər.

Bundan başqa, Rusiya Federasiyasının Voronej vilayətində yerləşən “Xoxolskaya” neft bazası və Krasnodar diyarındakı “Tamannefteqaz” neft terminalı hücuma məruz qalıb. Zərbədən sonra sahədə yanğın baş verib və neft saxlanılan üç rezervuar zədələnib.

Rusiya Federasiyasının Belqorod vilayətinin Kolotilovka yaşayış məntəqəsi də atəşə tutulub. Rusların canlı qüvvəsinə endirilən zərbələr nəticəsində çox sayda hərbçi həlak olub.