Ukrayna Rusiyanın hərbi texnikalarını məhv etdi! - Ordu bu şəhərə girdi

Rusiya ilə Ukrayna arasında vəziyyət gərgin olaraq qalır.

Ukrayna Silahlı Qüvvələrinin Baş Qərargahından bildirilib ki, son sutka ərzində cəbhədə gedən döyüşlərdə Rusiya Ordusunun daha 1060 hərbçisi öldürülüb. Bununla yanaşı, müdafiə qüvvələri 6 tank, 28 zirehli döyüş maşınını, 8 artilleriya sistemini, 2 raket, 108 əməliyyat-taktiki dron, 131 nəqliyyat vasitəsini sıradan çıxarıb.

“Financial Times”da yayılan məqalədə isə qeyd olunub ki, Rusiya Ordusu Ukraynanın şərqində hücumları gücləndirib, Pokrovsk ətrafında vəziyyət nəzərəçarpacaq dərəcədə pisləşib. Rusiyanın kiçik qoşunları şəhərə daxil olmağa nail olub. Buna səbəb olaraq isə Ukrayna Ordusunda şəxsi heyət çatışmazlığı göstərilib.

Rusiya Müdafiə Nazirliyindən bildirilib ki, gecə ərzində Hava Hücumundan Müdafiə qüvvələri Kaluqa, Bryansk vilayətləri və Moskva regionunda Ukraynanın 17 PUA-nı məhv edib.

Moskva meri Sergey Sobyanin əlavə edib ki, müdafiə sistemləri Moskvaya doğru uçan üç PUA-nı vurub. Hadisə yerinə Fövqəladə Hallar Nazirliyinin qüvvələri cəlb olunub.

Ukrayna Silahlı Qüvvələrinin Bryansk vilayətinə hücumu nəticəsində yanğın baş verib, hərəkətdə olan avtomobil yanıb, mülki şəxs xəsarət alıb.

“Rosaviasiya”nın yaydığı məlumata görə, gecə və səhər saatlarında PUA hücumu ilə əlaqədar olaraq sərnişinlərin təhlükəsizliyinin qorunması məqsədilə Kaluqa, Orenburq, Samara və Orsk hava limanlarında təyyarələrin uçuşuna və enişinə müvəqqəti məhdudiyyətlər qoyulub. Daha sonra isə məhdudiyyətlər qismən aradan qaldırılıb.