Ukrayna sərt cavab verəcək! - Zelenskidən Rusiyaya xəbərdarlıq

Rusiya Silahlı Qüvvələri iyulun 16-dan 17-nə keçən gecə və səhər saatlarında Ukraynanın Dnepr şəhərinə dronlarla kütləvi hücum edib. Nəticədə 1 nəfər ölüb, 10 nəfər yaralanıb.

Dnepropetrovsk hərbi administrasiyasının rəhbəri Sergey Lısak bildirib ki, yaralılardan 3-nün vəziyyəti ağırdır.

“Hava hücumundan müdafiə qüvvələri düşmənin təyyarə tipli 22 pilotsuz uçuş aparatını havada olarkən zərərsizləşdirib”, ‒ deyə Lısak əlavə edib.

Xerson da PUA hücumuna mıruz qalıb. Vilayətin hərbi administrasiyasından bildirilib ki, fərdi yaşayış evləri atəşə tutulub, 2 nəfər xəsarət alıb.

Ukrayna Prezidenti Volodimir Zelenski isə videomüraciətində bildirib ki, hava hücumu nəticəsində Donetsk vilayətində daha 2 nəfər vəfat edib, 11 nəfər xəsarət alıb:

“Bu, Rusiyanın növbəti terrorudur. Onların bombaladığı ərazilərdə hərbi infrostruktur yoxdur, məqsədli şəkildə daha çox insanın həyatına son qoymaq üçün dinc sakinlərin yaşadıqları əraziləri vururlar. Biz buna sərt cavab verəcəyik”.

Rusiyanın hava hücumundan müdafiə qüvvələri isə Ukraynaya məxsus 122 PUA-nı məhv edib. Voronejdə çoxmərtəbəli yaşayış binasının zədələndiyi açıqlanıb, 3 nəfər yaralanıb.

Belqorodda isə 1 nəfər həlak olub.

Qeyd edək ki, Moskvanın səmasında da 3 dron vurulub.