Ukrayna və Türkiyə liderləri arasında kritik telefon danışığı

Ukrayna Prezidenti Volodimir Zelenski türkiyəli həmkarı Rəcəb Tayyib Ərdoğanla Azərbaycan səfirliyinin binasını və "Bayraktar" zavodunun vurulmasını müzakirə edib.

Bu barədə V.Zelenski "X" səhifəsində yazıb.

"Biz Türkiyə tərəfindən göstərilən bütün yardımları yüksək qiymətləndiririk. Mövcud vəziyyətlə bağlı fikir mübadiləsi apardıq və növbəti diplomatik addımları müzakirə etdik. Ukrayna liderlər formatı ilə məşğul olmağa hazırdır, çünki bu, yeganə effektiv formatdır. Təəssüf ki, bundan yayınan və müharibəsini davam etdirən Rusiyadır", – deyə o qeyd edib.

V.Zelenski vurğulayıb ki, Rusiya Ukraynaya 30-dan çox raket və 600 dronla hücum edib.

"Türkiyəyə məxsus müəssisə, Azərbaycan səfirliyi, Aİ nümayəndəliyi, "British Council" və yaşayış məntəqələrinə hücumlar həyata keçirilib. Bu, Vladimir Putinin Ukrayna, ABŞ və avropalı tərəfdaşlarımızın qətlləri dayandırmaq üçün göstərdiyi bütün səylərə cavabıdır. Ona görə də təzyiq lazımdır – sanksiyalar, tariflər və siyasi tədbirlər vasitəsilə. Biz güclü addımlara ümid edirik", – deyə o vurğulayıb.

Ukrayna Prezidenti təhlükəsizlik təminatlarının geniş şəkildə müzakirəsi məsələsinə də toxunub.