Ukrayna vilayətlərinə kütləvi hava hücumu | Rəsmilər Baku TV-yə danışdı

Aprelin 24-ü və 25-də Ukraynanın Kiyev də daxil olmaqla əksər vilayətlərində hava həyəcanı siqnalları gün boyu davam edib. Bir həftəlik fasilədən sonra paytaxt Kiyev, Çerkassı, Sumı, Odessa, Nikolayev, Dnepropetrovsk, Xarkov, Xerson, Zaporojye vilayətləri davamlı hava hücumu təhlükəsi ilə üz-üzə qalıb.

Ukrayna Dövlət Fövqəladə Hallar Xidmətindən verilən məlumata görə, Nikolayevdə partlayışlar zamanı 2 nəfər həlak olub, 3 nəfər yaralanıb. Xarkov vilayətində isə aprelin 24-ü və 25-də ard-arda hücumlar nəticəsində 5 nəfər həlak olub, 9 nəfər yaralanıb.

Ukrayna Hərbi Hava Qüvvələri Komandanlığının rəsmisi İlya Elaş bildirib ki, düşmənin əsas hədəfləri enerji infrastrukturu olsa da, yaşayış evləri də zərər görür:

“Düşmən kritik və enerji infrastrukturlarına zərbələr endirməkdə davam edir. Bundan əlavə, səhər saat 6-da Çerkassı vilayətinə “İskəndər” raketlərindən zərbələr endirildi. Kritik infrastrukturlarımız zədələnib, insanların mənzillərinə və mülki şəxslərə də ziyan dəyib. Düşmən bu gün də taktiki aviasiyadan istifadə edir”.

Son vaxtlar daha çox hədəfdə olan vilayətlərdən biri də Ukraynanın böyük liman vilayəti Odessadır.

Odessa Fövqəladə Hallar Xidmətinin rəsmisi Marina Martinenkonun sözlərinə görə, bir neçə gün ərzində hücumlar nəticəsində mülki infrastruktura ziyan dəyib, yaşayış binaları zədələnib, yanğın baş verib.

“Xilasedicilər onları tez bir zamanda söndürüb. 34 nəfəri xilas etmişik. Onlardan 3-ü uşaqdır. Təəssüf ki, 4-ü uşaq olmaqla 9 nəfər yaralanıb. Hadisə yerində xidmətimizin psixoloqları çalışırlar. Zərərçəkənlərə, eləcə də yerli sakinlərə psixoloji yardım göstərirlər. Onların çoxu artıq evsizdirlər”, – deyə o bildirib.