Ukrayna Zaporojyedə yanacaq daşıyan qatara zərbə endirdi

Ukrayna Silahlı Qüvvələri Rusiya tərəfindən işğal olunmuş Zaporojye vilayətinin ərazisində yanacaq daşıyan qatarı məhv edib.

Rusiyanın yanacaq dolu çənlər daşıyan yük qatarına havadan zərbələr endirilib. Bu barədə məlumatı və görüntüləri İşğalın Öyrənilməsi Mərkəzinin rəhbəri Pyotr Andryuşenko paylaşıb.

“İşğal olunmuş Zaporojye vasitəsilə Rusiya ilə dəmir yolu əlaqəsi artıq mövcud deyil. Söz verdiyim kimi, dolu çənlər daşıyan yük qatarının məhv edilməsinin görüntülərini paylaşıram.

Heç nə salamat qalmayıb. Kim soruşurdu ki, ruslar niyə gecələr yanacaq daşıyır, həm də maşınlarla? Bax məhz buna görə, bu cür itkilərdən qaçmaq üçün”, – deyə paylaşdığı görüntüləri Pyotr Andryuşenko belə şərh edib.

Qeyd edək ki, avqustun 19-u gecə saatlarında Rusiya Silahlı Qüvvələri də 5 ballistik “İskəndər M” raketi və 270 “Şahed” tipli PUA ilə Ukrayna ərazilərinə hücum edib.