Ukraynada baş verənlər Türkiyəni hərəkətə keçirdi | MN rəsmisi açıqlama verdi

“Ukrayna üçün mümkün sülhməramlı missiyaya töhfə vermək məsələsi regional sabitliyin və sülhün bərqərar olması üçün zəruri hesab edilərsə, Türkiyə bunu bütün əlaqədar tərəflərlə müzakirə edəcək”.

Bunu Türkiyə Müdafiə Nazirliyinin sözçüsü Zəki Aktürk Ankaranın Ukraynada mümkün atəşkəsə nəzarət üçün hərbi qüvvə göndərib-göndərməyəcəyi barədə suala cavab verərkən deyib.

“Bizim fikrimiz odur ki, ədalətli və davamlı sülh yalnız hər iki tərəf danışıqlarda bərabər və ədalətli təmsil olunduqda əldə edilə bilər. Bu prosesdə ölkəmiz regionda sülhün bərqərar olmasına, Qara dənizin sülh dənizi kimi saxlanmasına və Ukraynanın yenidən qurulmasına yönəlmiş bütün konstruktiv təşəbbüsləri dəstəkləməyə davam edəcək. Bundan əlavə, dövlətimizin müvafiq qurumları ilə sıx koordinasiyada müharibənin dayandırılmasına yönəlmiş çoxşaxəli diplomatik təşəbbüsləri izləyirik.

Müxtəlif media qurumlarında gündəmə gətirilən, amma hələ də konseptual çərçivəyə salınmamış bir missiyaya töhfə vermək məsələsi regional sabitliyin və sülhün bərqərar olması üçün zəruri hesab edilərsə, bütün əlaqədar tərəflərlə qarşılıqlı şəkildə qiymətləndiriləcək”, – deyə nazirliyin sözçüsü bildirib.