Ukraynada bu ərazilər məhv ediləcək | ABŞ-nin icazəsinə Cabarovdan sərt reaksiya

“ABŞ-nin Kiyevə Rusiyanın dərinliklərinə raket zərbələri endirməyə icazə verməsi Üçüncü Dünya müharibəsinin başlamasına səbəb olacaq görünməmiş addımdır və amerikalılar bunu iki aydan sonra artıq heç nəyə cavabdeh olmayacaq qocanın əli ilə edirlər”.

Bu sözləri Rusiya Federasiya Şurasının Beynəlxalq Əlaqələr Komitəsi sədrinin birinci müavini Vladimir Cabarov deyib.

“Ümid edirəm ki, bizim hava hücumundan müdafiə sistemimiz bu cür hücumların öhdəsindən gələcək. Cavab zərbəsi elə olacaq ki, Ukraynadakı bütün qərar qəbuletmə mərkəzləri, Dnepr üzərindən keçən bütün körpülər məhv ediləcək. Zərbə dəhşətli ola bilər”, – o bildirib.

V.Cabarovun sözlərinə görə, gedən demokratların belə çirkin təxribat törətməsi əbəsdir: “Tramp üçün azad hərəkət imkanını azaldırlar. Tramp sülhdən danışır, onun ətrafı müharibəni dayandırmağın lazım olduğunu deyir. Hətta Şolts prezidentimizə zəng vurdu, bəzi müsbət hərəkətlər başladı…”.

Buna baxmayaraq, senator ABŞ Prezidenti Co Bayden administrasiyasının bu barədə qərarının saxta ola biləcəyini də istisna etməyib: “Hələlik biz bu məlumatı ehtiyatla qəbul etməliyik, çünki nə Pentaqon, nə də Ağ Ev bu məlumatı rəsmi olaraq təsdiqləyib”.

Qeyd edək ki, “Nyu York Tayms” Baydenin Ukraynaya ATACMS raketləri ilə Rusiyanın dərinliklərinə zərbə endirmək icazəsi verdiyi haqda məlumat yayıb.