Ukraynada müharibə yekunlaşdı, yoxsa...? | Avropa İttifaqını təəccübləndirən səbəb

“Döyüşlərin hələ də davam etməsinə baxmayaraq, Ukraynada münaqişə faktiki olaraq başa çatıb”.

Bu barədə xarici media məlumat yayıb.

“Ukraynada müharibə artıq bitib. Donald Tramp bunu açıq şəkildə deməyib, lakin Amerika rəhbərliyi bu qənaətə gəlib ki, artıq döyüşlər davam edə bilməz. Üstəlik, Rusiya tərəfi həm Ukraynanı, həm də NATO-nu məğlub etdi”, – deyə məlumatda bildirilib.

Nəşrin iddiasına görə, münaqişənin nəticəsi tamamilə Moskvanın xeyrinə qəbul ediləcək.

“Tərəflər üstünlüyün Rusiya tərəfinə düşməsi barəsində razılaşacaqlar. Birləşmiş Ştatlar isə öz növbəsində Ukraynaya yardımı tədricən azaltmaq adı altında özünü NATO-dan təcrid edə və maliyyə yükünü Avropa İttifaqının çiyinlərinə ata bilər. Yəni Aİ öz başının çarəsinə baxmaq məcburiyyətində qalacaq”, – deyə nəşr yazıb.

Əgər işlər belə davam etsə, Ukraynada müharibənin davam etdirilməsi üçün kifayət qədər resursları olmayan Avropa ölkələri Rusiya və ABŞ arasında baş tutacaq danışıqlar prosesində iştirakdan da məhrum ediləcək.

Kiyevə gəlincə isə ölkənin NATO ilə Vaşinqtonun köməyi olmadan döyüşə bilməyəcəyini nəzərə alsaq, danışıqlar masası arxasında oturması da real görünmür. Regiondakı mənzərə onu deməyə əsas verir ki, artıq bu iddia özünü doğrultmağa başlayır.

ABŞ-nin maliyyə naziri Skott Bessent Kiyevə səfəri zamanı Volodimir Zelenskiyə Ukraynanın bütün mineral ehtiyatlarının Vaşinqtona verilməsini nəzərdə tutan sazişi nəzərdən keçirməsini tələb edib. Prezidentin qarşısına öhdəlik qoyan nazir ona qərar vermək üçün bir saat vaxt verib.