Ukraynada son vəziyyət nə yerdədir?

Rusiya-Ukrayna danışıqlarının gedişi insanların sülhə olan ümidini azaldıb. Ukrayna sakinləri ABŞ-nin sülh planı ilə bağlı dəyişikliyin müsbət addım olmadığını düşünür. Sakinlər sözügedən planın Kiyevə heç nə vəd etmədiyi qənaətindədirlər.

“Mən televiziyada eşitdim ki, 28 bəndlik sülh planı 19 bəndə endirilib. Bu bizim başımıza gəldi. Rusiya ilə münasibətlərimiz o qədər düşmənçilik xarakteri alıb ki, Vladimir Putinin sülhə getmə ehtimalı çox azdır”, – sakinlərdən biri söyləyib.

Bu açıqlamanın fonunda Rusiya Ordusu Ukraynanın Dnepr şəhərini atəşə tutub. Raket hücumu nəticəsində azı 4 nəfər həlak olub. Daha 40 nəfər isə yaralanıb. Bundan əvvəl Donetsk bölgəsi hücuma məruz qalıb. Son 24 saat ərzində Sumı və Xarkov da daxil olmaqla bir çox istiqamətdən hücumlar həyata keçirilib.

Rusiya Ukraynanın 143 bölgəsində hərbi-sənaye kompleksləri, yanacaq anbarları və ölkə Ordusunun müvəqqəti yerləşdirmə məntəqələrini hədəf alıb. Rusiya Hava Hücumundan Müdafiə sistemi həmçinin 230 dron vurub. Tərəflər arasında 271 döyüş baş tutub.

Ukrayna Prezidenti Volodimir Zelenski daha əvvəl Rusiyanın ukraynalılara qarşı təxminən 1 400 dron, 1 100 hava bombası və 66 raketdən istifadə etdiyini açıqlayıb.