Ukraynadan Qərb qonşularına irad

Bu ilin yazından Rusiyanın “taxıl sazişi”ndən imtina etməsi Ukrayna taxılının dünya bazarına çıxışını demək olar ki, dayandırıb.

Rəsmi Kiyev problemin həlli üçün Polşa, Slovakiya və Sloveniya vasitəsilə bu tranziti həyata keçirməyə cəhd etsə də, qərb qonşularının gözlənilməz imtinası ilə üzləşib. Hətta buna görə Kiyevin qərb qonşularını beynəlxalq məhkəməyə verdiyi idda olunur.

Ukrayna Prezidentinin xüsusi nümayəndəsi, Ali Radanın deputatı Fedor Venislavski ölkəsindəki bu qlobal krizlə bağlı son vəziyyəti Baku TV-nin Şərqi Avropa bürosuna açıqlayıb.

O bildirib ki, Avropa İttifaqının üzvü olan qonşu ölkələrin Ukraynaya qarşı qeyri-dost addımı ticarət əlaqələrinə dair beynəlxalq normalara ziddir:

“Bəzi qonşu ölkələrin qərarları Beynəlxalq Ticarət Təşkilatının, Avropa İttifaqı qaydalarının pozulması deməkdir. Hesab edirəm ki, Ukrayna Avropa İttifaqına və digər ölkələrə məhsullarının sərbəst şəkildə tədarükünə dair bütün hüquqi mexanizmlərdən istifadə edəcək.

Başa düşürük ki, Ukrayna ilə həmsərhəd, Qərbdən olan tərəfdaşlarımızın bir çox qərarları həmin ölkələrdəki siyasi proseslərlə əlaqədardır. Məsələn, bu ölkələrdə fermerlər etiraz edirlər, çünki tədarük bazarlarını itirirlər. Ukraynanın kənd təsərrüfatı məhsulları daha ucuz və keyfiyyətlidir. Bu ölkələrin siyasətçiləri öz seçicilərinə müraciət etməyə məcburdur. Ukrayna bu istiqamətdə çalışır. Əsasən taxıl məhsulları daxil olmaqla, kənd təsərrüfatı mallarını quru dəhlizlə tədarük edirik. Amma dəniz marşrutunu da tədricən bərpa edirik”.

Qeyd edək ki, Ukraynanın taxıldan başqa digər qlobal əhəmiyyət kəsb edən kənd təsərrüfatı məhsulları da müharibə səbəbi ilə ixrac məhdudiyyəti ilə üz-üzədir.