Ukraynadan Rusiyaya qarşı yeni əməliyyatlar olacaq

Ukrayna Prezidenti Volodimir Zelenski Təhlükəsizlik Xidmətinin Rusiyaya qarşı yeni əməliyyatlarına razılıq verib.

“Mən Təhlükəsizlik Xidmətinin cəngavərlərinə minnətdaram. Biz detalları ictimaiyyətlə bölüşmürük, amma düşmən bizim hərəkətlərimizin nəticələrini hiss edir. Mən bir neçə əməliyyatın keçirilməsinə də razılıq verdim. İlin ilk yarısında Ukrayna Təhlükəsizlik Xidmətinin Rusiya hava hücumundan müdafiə sistemlərini sıradan çıxarmaqda göstərdiyi nəticə xüsusi olaraq diqqətəlayiqdir”, – deyə Zelenski qeyd edib.

Bu arada, ABŞ Dövlət Departamenti Ukraynaya M777 haubitsa avadanlığının təxminən 104 milyon dollara satışını təsdiqləyib. Bu barədə “Reuters” Pentaqona istinadən məlumat yayıb.

“Təklif olunan tədarüklər Ukraynanın özünü müdafiə etmək və regional sabitlik missiyalarını yerinə yetirmək qabiliyyətini artırmaqla ABŞ-nin xarici siyasət məqsədlərini və milli təhlükəsizlik maraqlarını dəstəkləyəcək”, – məlumatda deyilir.