Ukraynalı deputatlar Vardanyanın namizədliyinə etiraz etdi | Yazılı bəyanat

Ukrayna Ali Radasının 18 deputatı Ruben Vardanyanın Nobel Sülh Mükafatına namizəd kimi irəli sürülməsinə etiraz ediblər.

Yerli medianın məlumatına görə, onlar bununla bağlı yazılı bəyanat da yayıblar.

Ukraynalı deputatlar R.Vardanyanı terroru maliyyələşdirən şəxs kimi tanıdıqlarını bildiriblər. Bəyanatda həmçinin vurğulanır ki, R.Vardanyan Ukraynanın hüquq-mühafizə orqanlarına təhvil verilməlidir.

“Biz terrorizmi və separatizmi dəstəkləyən, korrupsiya qalmaqallarında iştirak edən, Rusiyanın postsovet ərazilərində təcavüzün sponsoru olan şəxsin Sülh Mükafatına namizəd göstərilməsini qəbuledilməz və absurd hesab edirik. Nobel Mükafatı Komitəsini R.Vardanyanın namizədliyini rədd etməyə çağırırıq. Bildiririk ki, cinayətləri sübut olunmuş şəxs sülh işinə xidmət etmək üçün ən yararsız fərddir”, – deyə bəyanatda qeyd olunub.

Xatırladaq ki, Ruben Vardanyan 2022-ci ildə Ukraynanın sanksiya siyahısına daxil edilib.