Ukraynalılar atəşkəsə inanmır

Vladimir Putinin Ukraynada apardığı müharibədə 2 günlük atəşkəs elan etməsi dünya gündəmində birmənalı qarşılanmayıb. Rusiya patriarxı Krillin tövsiyəsi ilə 6-7 yanvar Milad bayramı münasibətilə elan edilən birtərəfli atəşkəsə baxmayaraq, paytaxt Kiyev də daxil olmaqla bir sıra vilayətlərdə Rusiya Ordusu tərəfindən hava hücumu xəbərdarlığı edilib.

Ukrayna Prezidenti Volodimir Zelenskinin xüsusi nümayəndəsi, Ali Radanın deputatı Fyodor Venislavskiy Baku TV-yə açıqlamasında bildirib ki, bu addımla, əlsində, Rusiya Ukraynaya qarşı yeni təxribat hazırlayır.

“Rusiyanın bu qərarı ilə bağlı “ikiüzlülük” sözündən istifadə etmək lazımdır. Yəni onlar aldatmağa, görmək istədiklərini həqiqət kimi təqdim etməyə çalışırlar. Çünki hər hansısa hədəflərinə çatmaq niyyətindədirlər. Yaxşı anlayırıq ki, Rusiyanın operativ fasiləyə ehtiyacı var. Yəni onlar “nəfəslərini dərmək”, gələcəkdə hücum əməliyyatlarını davam etdirmək məqsədilə silahlı qüvvələrini müəyyən mənada yenidən formatlamaq istəyirlər. Üstəlik, bu gün-sabah Rusiyanın Ukrayna Silahlı Qüvvələrinə, hökumətinə qarşı ittihamlar irəli sürmək məqsədilə təxribat xarakterli addımlar atacağını istisna etmirəm. Bununla bu ölkə deyəcək ki, Ukrayna atəşin dayandırılmasına razılaşmadı. Nəticədə, Rusiya ilk növbədə ölkə vətəndaşlarını Ukraynaya qarşı müharibəyə motivasiya etməyə və onları növbəti səfərbərlik dalğalarına mənəvi baxımdan hazırlaşdırmağa çalışacaq”, - deyə o qeyd edib.