Ukraynanı gözləyən yeni təhlükə: Rusiya Ukraynanın işığını kəsəcək

Ukraynanın Müdafiə Nazirliyinin Baş Kəşfiyyat İdarəsi, o cümlədən kommunal təminat üzrə müvafiq qurumları yerli əhaliyə xəbərdarlıqlar ediblər.

Qış fəslinə hələ bir ay qalmış artıq Rusiyanın Ukraynada bir sıra enerji stansiyalarını, o cümlədən atom elektrik stansiyalarını hədəflədiyi açıqlanıb.

Ukrayna Ali Radasının deputatı Lüdmila Buymister bildirib ki, hazırda Rusiya məqsədli şəkildə Ukraynanın infrastrukturunu məhv etməyə çalışır:

“Tərəfdaşlarımızın yardımı ilə bu təhdidlərlə mübarizə apara bilirik. Bizim enerji sistemimiz Avropanın energetika sistemi ilə sinxronlaşdırılıb. Odur ki, bu gün Ukraynanın energetika sisteminin sabitliyi məhz Avropa İttifaqı ölkələrindən olan tədarüklər sayəsində təmin olunacaq. Ukraynanın qışı keçirə bilməsi üçün tədarük edilən enerji resurslarının kifayət edəcəyini söyləyə bilərik”.

Elektrik enerjisinin kəsilməsinə münasibət bildirən deputat deyib ki, ukraynalılar artıq buna öyrəşiblər.

L.Buymister əlavə edib ki, Ali Radanın həyata keçirməli olduğu yeganə məsələ Ukraynanın energetika nazirini vəzifəsindən azad etməkdir.