Ukraynanın paytaxtına hava hücumu davam edir

Ukrayna paytaxtı Kiyev növbəti dəfə hava hücumlarına məruz qalıb.

İran istehsalı olan dronlar vasitəsilə edilən hava hücumları Ukrayna Hava Hücumundan Müdafiə Sistemi tərəfindən zərərsizləşdirilsə də, onların qalıqları yaşayış yerlərində, şəxsi avtomobillərdə ciddi zərərə səbəb olub.

Zərərçəkənlər arasında Kiyevdə yaşayan azərbaycanlılar da var. Yaşadıqları mənzillər ciddi zərər görən həmyerlilərimiz xoşbəxtlikdən evlərində olmadıqları üçün insan tələfatı olmayıb. Buna baxmayaraq, mülki ukraynalılar arasında yaralananlar var.

Kiyev hərbi administrasiyasından bildirilib ki, Ukrayna paytaxtına son 6 gündə dronlarla 3-cü, dekabr ayı ərzində isə 5-ci hücum gerçəkləşdirilib:

“Dronlardan biri Kiyevin Solomensk rayonunda bədbəxt hadisəyə səbəb olub. Çoxmərtəbəli evin yuxarı 3 mərtəbəsində yanğın baş verib, digər 3-də isə pəncərələr sınıb. İlkin məlumatlara görə, 2 nəfər müxtəlif dərəcəli kəsik xəsarətləri alıb, 1 nəfər xəstəxanaya yerləşdirilib.

Darnitsk rayonuna dron hissələrinin düşməsi qeydə alınıb. Orada 2 mərtəbəli fərdi evdə yanğın baş verib. Xəsarət alan yoxdur. Qoloseyevsk rayonuna da dron hissələri düşüb. Xəsarət alan olmayıb”.

Qeyd edək ki, gün ərzində bütün Ukrayna üzrə hava hücumu xəbərdarlığı davam edib. Bu əvvəlki aylarla müqayisədə rekord vəziyyətdir.