Ukraynanın şəhərlərinə kütləvi hücumlar edildi

Rusiya Ukraynaya növbəti kütləvi hücumunu həyata keçirib.

Ukrayna mediasının məlumatına görə, hücum zamanı PUA-lar və raketlərdən istifadə olunub.

Zərbələr nəticəsində Kiyev, Krivoy Roq, Odessa, Kremençuk, Xarkov, Zaporojye hədəf alınıb. Zərbələr zamanı 700 ədəd “Geran-2” PUA-larından istifadə olunması ehtimal edilir. Kiyevə 4 “İskəndər-K” qanadlı raketlə zərbə endirilib, hadisə yerində güclü yanğın olub.

Kiyev şəhər hərbi administrasiyasının məlumatına görə, hücum nəticəsində 15 nəfər xəsarət alıb. PUA-nın düşməsi nəticəsində hökumət binasında yanğın baş verib. Kremençukda Dnepr üzərindəki körpüdə, həmçinin Svetlovodsk su anbarı bölgəsində zərbələr qeydə alınıb.

Hücum zamanı Krivoy Roq şəhərində elektrik enerjisində fasilələr yaranıb. Daha sonra 8 “İskəndər” raketi ilə yenidən zərbə endirilib. Odessada PUA-lar strateji obyektləri, o cümlədən limanı vurub. “Şkolnıy” hava limanında partlayışlar barədə xəbər verilib. Zaporojyedə Abrasiv kombinatın yaxınlığında bir neçə partlayış olub, kimya sənayesi müəssisəsi zərbə ilə üzləşib. Dnepropetrovsk və ətrafı, Xarkov, Kiyev bölgəsində partlayışlar eşidilib.