Ukraynanın təhlükəsizliyi üçün yeni model Rusiyanı qane edəcək?

Rusiya və Ukrayna arasında sülh sazişi əldə olunarsa, ABŞ yaradılması planlaşdırılan geniş bufer zonanın nəzarətini həyata keçirə biləcək əsas tərəf ola bilər.

“NBC News”un məlumatına görə, Ukraynanı Rusiyadan qorumaq məqsədilə planlaşdırılan zona ABŞ daxil olmaqla Ukraynanın müttəfiqlərinin hərbi rəsmiləri tərəfindən müzakirə olunur. Bu zonanın qorunması üçün isə Səudiyyə Ərəbistanı, hətta Banqladeş kimi NATO-ya daxil olmayan ölkələrin əsgərləri yerləşdirilə bilər.

Nəşrin yazdığına görə, ABŞ hərbçilərinin isə Ukraynaya göndərilməsi planlaşdırılmır.

“Ukraynanın təhlükəsizliyi xarici hərbi kontingentlər tərəfindən təmin edilə bilməz, bu, Rusiyanı qane etməyəcək”.

Bu fikri Rusiya Prezidentinin mətbuat katibi Dmitri Peskov səsləndirib.

“Ukraynanın təhlükəsizliyini xarici, xüsusilə də Avropa və Amerika hərbi kontingentləri təmin edə bilərmi? Qətiyyən yox, edə bilməzlər. Bu, ölkəmizi qane edəcək təhlükəsizlik zəmanəti ola bilməz”, – deyə Peskov əlavə edib.