Ukraynaya nə qədər yardım ayrıldı? | Zelenskidən açıqlama

“Ukrayna öz ərazisində silah tədarükü və istehsalını artırmaq üçün tərəfdaşlarla işləyir”.

Bunu Ukrayna Prezidenti Volodimir Zelenski deyib.

“Artıq yaxşı razılaşmalar var. Biz daha çox razılaşmalar gözləyirik, qarşıdakı həftələrdə bunun üçün çalışacağıq. Daha çox qüvvə, daha çox resurs, daha çox hava hücumundan müdafiə sistemi əldə edə bilmək üçün hər bir razılaşmanı mümkün qədər tez həyata keçirmək vacibdir. Bu, əsas prioritetdir”, – deyə V.Zelenski videomüraciətində bildirib.

Əlavə edib ki, Ukrayna Avropadakı müttəfiqlərindən və ABŞ-dən yaxşı xəbərlər alıb. O bildirib ki, əldə etdiyi məlumatlara görə, silah tədarükü artıq bərpa olunub.

Bu arada, ABŞ Senatının Silahlı Qüvvələr Komitəsi 2028-ci ilə qədər Ukraynaya hərbi yardım üçün 500 milyon dollar vəsaitin ayrılmasını təsdiqləyib. Bu barədə komitənin dərc etdiyi sənədlərdə bildirilir. Müvafiq bənd bu komitə tərəfindən təsdiqlənən 2026-cı maliyyə ili üçün ABŞ-nin müdafiə büdcəsi layihəsinə daxil edilib. Komitənin təklif etdiyi büdcə layihəsi ABŞ-nin Ukraynaya etibarlı müdafiə qabiliyyətinin təmin olunmasında kömək etmək üçün əməkdaşlığın gücləndirilməsini nəzərdə tutur.