Ukraynaya rekord sayda dron hücumu: Rusiya-Ukrayna savaşında son durum

Ukraynada gedən müharibə son günlər daha intensiv qarşılıqlı hücumlarla müşayət olunur.

Ölkənin Müdafiə Nazirliyinin açıqlamasına görə, ötən ay il yarımdan çox davam edən müharibə fonunda rekord sayda dron hücumlarına məruz qalıblar. Belə ki, sentyabr ayı ərzində Ukrayna üzərinə 550-dən çox dron buraxılıb.

Ukrayna Hərbi Hava Qüvvələri Komandanlığının sözçüsü Yuri İqnat bildirib ki, bunlar İran istehsallı “Shahed”, Rusiyanın istehsal etdiyi “Lanset”, “Kub” PUA-larıdır:

“Ehtimal edirik ki, Ukraynaya bundan sonra bu silahlarla hücumların sayı artacaq. Rusiya müxtəlif istiqamətlərdən PUA-lar buraxır: işğal altındakı Krımdan, Krasnodar diyarından və Kursk-Bryansk bölgəsindən. Biz PUA-ları daha ucuz başa gələn və rasional metodlarla vurmağa çalışmalıyıq. Amma bizdə raketlər elə də çox deyil. Bu gün bizə həm “Buk M-1”, “S-300” kimi zenit-raket kompleksləri, həm də “Patriot”, NASAMS və s. kimi Qərb ölkələrinin istehsal etdiyi zenit-raket kompleksləri tədarük olunur. Hazırda bu tədarüklərdən asılıyıq. Buna görə də PUA-ları, “Gepard” zenit-raket kompleksləri və ya sovet dönəminə aid digər sistemlər və ya yeni, perspektivli vasitələrlə məhv etmək lazımdır”.

O qeyd edib ki, Ukrayna PUA-lara qarşı həm köhnə, həm də yeni sistemlər almağa çalışır: “Bu gün Ukraynada silah çeşidi səviyyəsi çox yüksəkdir. F-16 qırıcılarının tədarükünü də gözləyirik. Bu döyüş təyyarələri bizim ölkəmizin hava məkanını qoruyacaq və bu qırıcılar vasitəsilə Ukraynanın işğal altındakı ərazilərindəki Rusiya qoşunlarına zərbələr endiriləcək”.

Yuri İqnat vurğulayıb ki, düşmən təkcə hərbi obyektləri deyil, liman və mülki obyektləri də hədəf alır.

Ukrayna Hərbi Hava Qüvvələri Komandanlığının sözçüsü onu da bildirib ki, üzü qışa doğru Ukraynaya şimaldan da yeni kəskin hücumların olacağı gözlənilir.