Umerov ABŞ-yə səfəri zamanı Trampın sülh planını müzakirə etdiyini təsdiqlədi

Ukrayna Milli Təhlükəsizlik Şurasının katibi Rustem Umerov ABŞ-yə səfəri zamanı Prezident Donald Trampın sülh planını müzakirə etdiyini təsdiqləyib.

Bu barədə o, "Telegram" kanalında məlumat verib.

Lakin Rustem Umerov Ukraynanın hələ bu plana razılıq vermədiyini və danışıqların davam etdiyini qeyd edib.

"ABŞ-yə səfərim zamanı mənim vəzifəm texniki xarakter daşıyırdı – görüşlərin təşkili və dialoqa hazırlıq. Heç bir qiymətləndirmə, xüsusən də hər hansı bəndin razılaşdırılması ilə bağlı qiymətləndirmə verməmişəm. Bu mənim səlahiyyətlərimə daxil deyil və prosedura uyğun gəlmir.

Dünən Ukrayna liderinin Prezident Tramp tərəfindən səlahiyyətləndirilən ABŞ nümayəndə heyəti ilə danışığı baş tutub. Bu gün isə bu iş Kiyevdə artıq komandalar arasında texniki səviyyədə davam edir. Biz tərəfdaşlarımızdan bütün təklifləri diqqətlə araşdırırıq və Ukraynanın mövqeyinə qarşı eyni düzgün münasibəti gözləyirik", – deyə Umerov yazıb.

Eyni zamanda Umerov mətbuatın yazdığı kimi, Ukraynaya göstərilən beynəlxalq yardımın yoxlanılması ilə bağlı bəndin Ukraynanın xahişi ilə plandan çıxarıldığını da inkar edir.

"İddia edilən "razılaşmalar" və ya "bəndlərin çıxarılması" ilə bağlı mediada yayılan xəbərlərin reallıqla heç bir əlaqəsi yoxdur. Bunlar məsləhətləşmələr kontekstindən kənarda ortaya çıxan təsdiqlənməmiş məlumatların nümunələridir. Biz tərəfdaşlarımızın təkliflərini Ukraynanın dəyişməz prinsipləri – suverenlik, insanların təhlükəsizliyi və ədalətli sülh çərçivəsində diqqətlə nəzərdən keçiririk", – deyə o əlavə edib.