Ümid edirəm ki, federal hökumət... | Karen Bassdan reydlərlə bağlı açıqlama

Los-Anceles meri Karen Bass ABŞ hökumətini İmmiqrasiya və Gömrük Mühafizəsi tərəfindən qanunsuz miqrantları saxlamaq üçün şəhərdə keçirilən reydləri dayandırmağa çağırıb.

O, Donald Tramp Administrasiyasını şəhərdə xaos yaratmaqda ittiham edib.

“Ümid edirəm ki, federal hökumət xahişimizə qulaq asacaq: reydləri dayandırın”, ‒ K.Bass deyib.

Los-Anceles meri reydləri “əsassız və lazımsız” adlandırıb və təhlükəsizlik qüvvələrinin hərəkətlərinin şəhərdə qorxu və xaos yaratdığını bildirib.

K.Bassın dediyinə görə, reydlər ştatın iqtisadiyyatına ziyan vuracaq, çünki işçi qüvvəsinin əksəriyyətini təşkil edən miqrantlar işə getməkdən qorxacaqlar.

K.Bass həmçinin Prezident Donald Trampın ABŞ Milli Qvardiyasının qoşunlarını şəhərə göndərmək qərarını Los-Ancelesdə “iğtişaşlar və xaos yaratmaq cəhdi” adlandırıb.

ABŞ Prezidenti şəhərdə iğtişaşları yatırmaq üçün Milli Qvardiyanın Los-Ancelesə göndərilməsi barədə göstəriş verib.

CNN-in məlumatına görə, bundan sonra Los-Ancelesdə 1700-ə yaxın Milli Qvardiya hərbçisi yerləşdirilib. Ardınca ABŞ Müdafiə Nazirliyi şəhərə təxminən 700 dəniz piyadasının yerləşdirildiyini açıqlayıb.

ABŞ-nin müvafiq qurumları tərəfindən iyunun 6-da şəhərdə aparılan reydlər o vaxtdan bəri davam edən iğtişaşlara səbəb olub. Reydlər zamanı azı 44 miqrant immiqrasiya qanunlarını pozmaqda ittiham olunaraq həbs edilib.