Uzun illər sonra filmin surəti tapıldı | Rəqəmsal formata köçürüldü

Nyu-Yorkda ABŞ-nin 16-cı prezidenti Avraam Linkolnun həyatından bəhs edən “Linkolnun ürəyi” adlı səssiz filmin itirilmiş lenti tapılıb.

NBC xəbər verir ki, Nyu-York ştatının Qrinport şəhərində yerləşən Lauro Tarixi Filmlər Arxivində çalışan təcrübəçi Den Martin köhnə filmlərin qutularını araşdırarkən bu lentə rast gəlib.

Kino arxivçi Eliot Kisseleff filmi təmizləyərək rəqəmsal formata çevirib ki, bundan sonra onun yenidən itməsinin qarşısı alınsın. Onun sözlərinə görə, lentin yaxşı vəziyyətdə qalması böyük şansdır.

16 millimetrlik lent “Linkolnun ürəyi” filminin yeganə məlum olan surətidir. Bu film ABŞ Konqres Kitabxanasının əbədi itirilmiş hesab edilən 7 000 səssiz filmi əhatə edən siyahısına daxil edilib. 1915-ci ildə “Universal” şirkəti tərəfindən istehsal olunmuş həmin film uzun illər ərzində itkin sayılırdı.

Filmin rejissoru və baş rol ifaçısı Frensis Ford olub. Film yalnız Linkolnun həyatından deyil, həm də ABŞ-də Vətəndaş müharibəsi dövründən bəhs edir.