Vaşinqton rəsmisindən açıqlama | ABŞ-İran arasında son vəziyyət - Baku TV

İsveçrədə İran və ABŞ arasında texniki danışıqlar davam edir.

Bu barədə ABŞ-nin vitse-prezidenti Cey Di Vens İsveçrədən yola düşməzdən əvvəl jurnalistlərə açıqlamasında bildirib.

O qeyd edib ki, hər iki ölkənin nümayəndə heyətlərinin bir qismi danışıqları davam etdirmək üçün İsveçrədə qalıb.

“Komandamızın böyük bir hissəsini geridə qoyduq. İranlılar da komandalarının böyük bir hissəsini işi davam etdirmək üçün orada qoyublar”, – deyə Vens bildirib.

Vens ABŞ-İran danışıqlarına toxunaraq vurğulayıb ki, ümumilikdə çox məhsuldar bir görüş keçirilib.

Ümumilikdə bu, çox məhsuldar keçən 36 saat oldu deyən Vens eyni zamanda İran və ABŞ arasında dialoqda irəliləyiş olduğuna inandığını söyləyib.

Qeyd edək ki, iyunun 21-də İsveçrənin Bürgenştok şəhərində Qətər və Pakistanın vasitəçiliyi ilə ABŞ və İran arasında sülh danışıqlarının ilk raundu keçirilib. ABŞ nümayəndə heyətinə vitse-prezident Cey Di Vens, Donald Trampın xüsusi elçiləri Stiv Uitkoff və Cared Kuşner başçılıq ediblər. İran tərəfindən danışıqları parlamentin spikeri Məhəmməd Baqir Qalibaf və xarici işlər naziri Abbas Əraqçi aparıb.

Tərəflər texniki məsləhətləşmələri həftənin sonunadək davam etdirmək və danışıqlar prosesinə nəzarət etmək üçün yüksəksəviyyəli komitə təsis etmək barədə razılığa gəliblər.