Voronejdə neft zavodu partladıldı

Rusiyanın Voronej vilayətində neft zavodunda güclü yanğın başlayıb. Bu barədə Rusiya KİV-də məlumat yayılıb.

İlkin məlumatlara əsasən, yanğın helikopterdən endirilən zərbələr nəticəsində baş verib. Zavoddakı yanğını bir neçə kilometr uzaqdan müşahidə etmək mümkündür.

Qeyd olunub ki, Rusiya qoşunları “Vaqner” hərbi qüvvələrini təchizatsız qoymaq üçün Voroneji bombalayır və neft anbarını vurur. Hazırda Voronejdə Rusiyanın ordu birləşmələri ilə “Vaqner” muzdlu hərbi təşkilatının üzvləri arasında döyüşlər gedir.

Qeyd edək ki, özəl hərbi şirkətin rəhbəri Yevgeni Priqojin iyunun 24-ü gecə saatlarında hərbçiləri ilə birlikdə Rusiyanın Rostov şəhərinə daxil olub. O, Rusiya müdafiə naziri Sergey Şoyqu və baş qərargah rəisi Valeri Gerasimovun saxlanılaraq hərbi məhkəmə qarşısına çıxarılmasını tələb edir və əks təqdirdə qiyamın dayandırılmayacağını bildirib.