Xalqımızdan bunu almağa heç kim cürət etməz | Kobaxidze

“Biz Gürcüstanda “Maydan”ın və ölkənin ukraynalaşdırılmasının qarşısının alınması üçün hər şeyi edəcəyik”.

Bunu Gürcüstanın Baş naziri İrakli Kobaxidze jurnalistlərə açıqlamasında deyib.

Hökumət rəhbəri həmçinin Gürcüstanın Avropa İttifaqının namizəd statusunun dayandırılması çağırışlarına da münasibət bildirib:

“Bizə davamlı olaraq “Maydan” xatırladılır. Mən sizə “Maydan”ın Ukraynaya nə gətirdiyini xatırlatmaq istəyirəm. Bundan əvvəl Ukrayna iqtisadiyyatı yüksəlişdə olan ölkə idi. Bu gün ölkə məhv edilib, iqtisadiyyat pis haldadır. Biz ölkəmizdə ikinci cəbhənin açılmasına icazə verməyəcəyik.

Avropa İttifaqının namizəd statusunun dayandırılması çağırışlarına gəldikdə isə deyə bilərəm ki, heç kəs gürcü xalqını cəzalandırmağa cürət etməz. Onlar özləri hər zaman deyirdilər ki, namizəd statusu hökumətə deyil, Gürcüstan xalqına verilir. Belə bir vaxtda kimsə Gürcüstan xalqından namizəd statusunu alacaqsa, bu, çox gülünc olar”.

Xatırladaq ki, Rusiya xarici işlər nazirinin müavini Mixail Qaluzin bir müddət əvvəl Qərbin Rusiya ilə sərhədləri yaxınlığında həyata keçirmək istədiyi planlarından danışıb. Onun iddiasına görə, “qoca qitə” adıçəkilən regionda yeni gərginlik mənbəyi yaratmaq üçün oktyabra qədər Gürcüstanda yeni “Maydan” ssenarisini həyata keçirməyə çalışır.