Xameneinin ölümü İranı zəiflədəcək, yoxsa...? | Əraqçi sözünü dedi - Baku TV

“İranda Əli Xameneinin öldürülməsi ilə mövcud sistemin çökəcəyinə inanmırlar”.

Bunu İranın xarici işlər naziri Abbas Əraqçi deyib.

O bildirib ki, Xameneinin və yüksəkrütbəli komandanların öldürülməsinə baxmayaraq, İranın hələ də dünyanın ən böyük ordularından biri qarşısında dayanması və güclü cavablar verməsi onu göstərir ki, mövcud sistem köklü və möhkəm struktura malikdir və şəxslər getməsi ilə dağılmaya məruz qalmır.

Xarici işlər naziri bir daha vurğulayıb ki, hazırkı müharibədə İran haqlı tərəfdir. Onun sözlərinə görə, rəsmi Tehran müharibənin qarşısını almaq və regionda sülhü qorumaq üçün heç nəyi əsirgəməyib və danışıqlar yolunu sınayıb.

Bu arada, ABŞ və İsrailin İranın İsfahan əyalətinə endirdiyi zərbələr nəticəsində azı 47 nəfər ölüb. Bu barədə “Tasnim” xəbər agentliyi məlumat yayıb.

İran isə ABŞ-nin Bəhreyndəki hərbi bazalarına, həmçinin İraqın Bağdad Hava Limanı yaxınlığındakı obyektlərinə zərbələr endirib.

BBC-nin məlumatına görə, Bəhreyndəki bazada ABŞ Hərbi Dəniz Qüvvələrinin Beşinci Donanmasının qərargahı yerləşir.

“Al Hadath” telekanalı isə xəbər verib ki, Bağdad aeroportu yaxınlığında ABŞ-nin rəhbərlik etdiyi beynəlxalq koalisiya tərəfindən istifadə olunan hərbi baza da hücuma məruz qalıb.

İsrail və ABŞ-nin İrana qarşı başlatdığı hərbi əməliyyatlar isə azı aprel ayına qədər davam edə bilər. Bu barədə “Kan” dövlət televiziyası adı açıqlanmayan dövlət rəsmisinə istinadən məlumat yayıb.

Məlumata görə, İsrail Pasxa bayramına qədər əməliyyatları davam etdirməyi planlaşdırır.

Qeyd edək ki, bu il Pasxa bayramı aprelin 1-dən 8-dək qeyd olunacaq.