Yaponiyanın Baş nazirindən dünyaya radiasiya mesajı

Yaponiyanın Baş naziri Fumio Kişida naharda dəniz məhsulları, həmçinin “Fukusima-1” Atom Elektrik Stansiyasında çirklənmiş suyun dənizə atıldığı Fukusima bölgəsində istehsal olunan donuz əti, düyü və bostan məhsulları yeyib.

Xarici media xəbər verir ki, bu barədə yapon jurnalistlər məlumat yayıblar. Hökumət başçısı nahar zamanı nazirlərlə AES-dən suyun okeana axıdılmasını müzakirə edib. Bununla da o, stansiyanın yerləşdiyi Fukusima prefekturasında tutulan kambala, levrek və digər dəniz canlılarından hazırlanmış yeməkləri yeyib.

İqtisadiyyat, ticarət və sənaye naziri Yasutoşi Nişimura jurnalistlərə açıqlamasında “Çox dadlı idi, xüsusən də osminoq çox yumşaq idi” deyib.

Qeyd edək ki, avqustun 24-də “Fukusima-1” AES-in rəhbərliyi zədələnmiş reaktorların soyudulması üçün istifadə edilən radioaktiv suyu dənizə axıtmağa başlayıb. Sözügedən naharın əhaliyə “təhlükə yoxdur” mesajını vermək üçün təşkil edildiyi bildirilir.