Yaralı təxliyə edir, mina təmizləyir, atəş açır | Döyüş robotları ön xətti ələ keçirir?

“Hərbi xronika”nın budəfəki buraxılışında müasir müharibələrin yeni reallığına çevrilən yerüstü pilotsuz döyüş maşınlarının (UGV) inkişafı, döyüş meydanında tətbiqi və gələcək perspektivləri təhlil olunub.

Bildirilib ki, ekipajsız, məsafədən idarə olunan və ya qismən avtonom fəaliyyət göstərən bu platformalar artıq kəşfiyyat, sursat və ərzaq daşınması, yaralıların təxliyəsi, mina təmizlənməsi, müşahidə və birbaşa döyüş tapşırıqlarında geniş istifadə olunur. Onlar müxtəlif silah sistemləri və avadanlıqlarla təchiz edilərək fərqli missiyalara uyğunlaşdırıla bilir.

Qeyd olunub ki, müasir döyüş meydanında pilotsuz uçuş aparatları, yüksək dəqiqlikli silahlar və peyk müşahidəsi səbəbindən ön xətt daha təhlükəli olduğundan riskli tapşırıqların robotlar tərəfindən icra edilməsi insan itkilərinin azaldılması baxımından xüsusi əhəmiyyət daşıyır.

Vurğulanıb ki, Ukrayna müharibəsi yerüstü robotların inkişafında dönüş nöqtəsi olub. Bu platformalar artıq minlərlə döyüş tapşırığında iştirak edir, hətta tarixdə ilk dəfə tam robotlaşdırılmış amfibiya hücumu həyata keçirilib. Bununla yanaşı, Estoniyanın THeMIS, İsrailin “Guardium”, ABŞ-nin MUTT, Rusiyanın “Uran-9” və Türkiyənin BARKAN platformaları müxtəlif istiqamətlərdə bu texnologiyanın tətbiqini nümayiş etdirir.