Yaşar Gülər İrana od püskürdü | Türkiyə hərəkətə keçir

“PKK terrorçuları İrana qaçıb və orada gizləniblər”.

Belə bir açıqlama ilə Türkiyənin milli müdafiə naziri Yaşar Gülər çıxış edib. Bildirib ki, bununla bağlı faktların olmasına baxmayaraq, rəsmi Tehran açıqlama verməkdən imtina edir.

“Biz həm İran, həm İraq, həm də Suriya sərhədində terrorla mübarizə aparırıq. İran sərhədində PKK-ya qarşı vuruşduğumuzu bildirmişik. Lakin terrorçular İranla sərhədi keçib qaçırlar. Biz rəsmi Tehranla dəfələrlə əlaqə saxlasaq da, onlar bunu boyunlarına almırlar. Hətta biz PUA ilə sərhəd bölgəsini izlədiyimizi də demişik. Lakin İran tərəfi yenə də bizə belə bir hadisənin yaşanmadığını deyir. Bu, heç də xoş vəziyyət deyil”, – deyə o qeyd edib.

Yaşar Gülər həmçinin PKK-nın İraqın şimalında məskunlaşdığını və illərdir fəaliyyətini oradan davam etdirdiyini bildirib.

Türkiyəli nazir adıçəkilən terror təşkilatının İraqda 800 kəndi tamamilə boşaltdığını və oradakı mülki əhalinin acınacaqlı vəziyyətdə olduğunu da açıqlayıb.

Nazir sonda onu da əlavə edib ki, Türkiyə terrorla mübarizə əməliyyatlarını hər zaman davam etdirəcək.