“Yaşıl şahzadə”dən sensasiyalı açıqlama | Yaraqlıların İsrail planını ifşa etdi

HƏMAS-ın təsisçilərindən olan Şeyx Həsən Yusif Xəlil Daudun oğlu Musab Həsən Yusif həmrəylik və dəstək göstərmək məqsədilə İsrailə səfər edib.

Bu barədə İsrail “Telegram” kanalları məlumat yayıb. Məlumata görə, Musab HƏMAS-ın 2023-cü ilin oktyabrında hücum etdiyi İsrailin cənub rayonlarında olub.

İsrail mətbuatına açıqlamasında Musab BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyinə məxsus məktəblərdə yəhudilərə və İsrailə nifrət təbliğatı aparıldığını deyib: “Hər yerdə – küçədə, evdə yəhudilər və İsrailə qarşı nifrət kampaniyası aparılır”.

Onun sözlərinə görə, HƏMAS qəzzalıların rifahı ilə maraqlanmır, terror təşkilatının rəhbərləri xırda siyasi maraqlara nail olmaq üçün mülki vətəndaşları qurban verirlər: “Hər müharibə eyni ssenari üzrə gedir: Qəzzalılar ölür və HƏMAS Körfəzdəki donorlardan milyonlar alır”.

Qeyd edək ki, “Yaşıl şahzadə” kod adlı Musab Həsən Yusif 90-cı illərdən İsrail xüsusi xidmət orqanları ilə əməkdaşlıq edir. 2005-ci ildə xristianlığı qəbul edən Musab həm də “HƏMAS-ın oğlu” kitabının müəllifidir.