Yaxın Şərqdə gərginlik pik həddə | İsrail Ordusunun bu hücumundan sonra...

Yaxın Şərqdə vəziyyət atəşkəs razılaşmasının pozulması ilə daha da gərginləşib.

Hücumlar nəticəsində son 24 saat ərzində azı 62 nəfər həyatını itirib, 296 nəfər yaralanıb.

Xarici medianın məlumatına görə, İsrail Ordusu Cəbəliyyə, Beyt Lahiya, Xan Yunis, Rəfah şəhərlərinə və Əl-Bureyc qaçqın düşərgəsinə aviasiya, dron və artilleriyadan istifadə etməklə zərbələr endirib.

Qeyd edək ki, 2 aylıq atəşkəsdən sonra İsrail ordusunun martın 18-də anklavda döyüşləri bərpa etməsi ilə Qəzzada azı 792 nəfər ölüb, yaralananların sayı isə 1663 nəfəri keçib.

Bütün bunların fonunda, HƏMAS hərbi qruplaşmasının siyasi bürosunun üzvü Husam Badran İsraili müharibəni bitirməyə çağırıb.

Badran qarşı tərəfi atəşkəs razılaşmasına əməl etməməkdə ittiham edib. Lakin görünən mənzərə onu deməyə əsas verir ki, Fələstin xalqı artıq HƏMAS-ın vədlərinə inanmır. Qəzza zolağının şimalında yüzlərlə insanın iştirakı ilə keçirilən kütləvi etiraz aksiyaları da bunun sübutudur.

Nümayişçilər qruplaşmanın fəaliyyətindən narazı olduqlarını dilə gətirib və İsraillə müharibəyə son qoyulmasını tələb ediblər. İndoneziya xəstəxanasının qarşısına toplaşan nümayişçilər əllərində “Müharibəyə son” və “Biz sülh istəyirik” şüarları ilə çıxış ediblər.