Yaxın Şərqdə münaqişəni alovlandıranlar ilə bağlı bilinməyənlər: Hindistan nəşrindən iddia

1990-cı ildən bu günə qədər HƏMAS hərəkatı liderləri Qəzza zolağında faktiki olaraq bütün maliyyə axınlarına nəzarət edirlər.

Onların ailələri isə ölkə hüdudlarından çox-çox uzaqda lüks həyat yaşayırlar. İsrail-HƏMAS müharibəsinin getdikcə daha şiddətli hal alması isə onlar üçün daha çox pul mənimsəməyə əla fürsət yaradıb.

Belə bir iddia ilə Hindistanın “Firstpost” nəşri çıxış edib. Media orqanı bu barədə məlumatı “HƏMAS liderləri dəbdəbəli həyat yaşayarkən Qəzzalılar ölür” başlığı ilə məqaləsində dərc edib.

Bəs HƏMAS-ın liderləri kimlərdir? Ölkədəki böhrana baxmayaraq, onlar öz kapitallarını necə artırırlar?

Partiyanın əsas liderlərindən olan HƏMAS-ın Siyasi Bürosunun rəhbəri İsmayıl Haniyə Qəzza zolağını tərk edərək Qətərdə məskunlaşıb. Məlumata görə, İ.Haniyənin Beyrut, Doha və İstanbulda bahalı villaları var. O, təkcə evlərə deyil, milyonlarla dollar dəyərində qiymətləndirilən şəxsi bizneslərə və təyyarələrə də sahibdir.

2006-cı ildə İ.Haniyə media nümayəndələri qarşısında çıxış edərək “qalan günlərimi sizinlə bir əqidəni paylaşaraq, quru çörək yeyərək azadlığımız uğrunda mübarizə aparacağıma söz verirəm” demişdi. Amma çox keçmədən bu sözlər unuduldu.

Qürbətdən vətən həsrəti çəkmək qərarına gələn Siyasi Büronun rəhbəri 2021-ci ildən bu günə qədər yaşadığı Qətərdə hər şənbə futbol oynayarkən görüntüləndi.

Misirin “Rose əl-Yusuf” jurnalının yazdığı xəbərə görə, İ.Haniyə 2010-cu ildə böyüdüyü Şati qaçqın düşərgəsinin yaxınlığında yerləşən Qəzza sahilindəki torpaq sahəsinə 4 milyon dollar xərcləyib. Son 13 ildə 13 övladlı ata hər övladının adına rəsmiləşdirilmiş bir neçə mənzil, villa və bina alıb.

Beş il əvvəl ABŞ-nin Dövlət Departamenti İsmayıl Haniyəni terrorçu kimi elan etsə də, bu status ona sərvətini artırmağa mane olmayıb. Onun hazırda sərvəti 4 milyon dollar dəyərində qiymətləndirilsə də, varidatının əksəriyyətinin kürəkəninin adına keçirdiyi bildirilir.