Yaxın Şərqdəki vəziyyət və Qara dənizin təhlükəsizliyi müzakirə olunub

Rusiya Prezidenti Vladimir Putin iranlı həmkarı Məsud Pezeşkianla telefon danışığı aparıb.

Tərəflər Yaxın Şərqdəki vəziyyəti müzakirə ediblər.

Putin Rusiyanın münaqişənin tez bir zamanda deeskalasiyasının lehinə olduğunu bir daha xatırladıb.

Pezeşkian isə Moskvaya dəstəyinə və humanitar yardımına görə təşəkkür edib.

Qeyd edək ki, bu, Putinin İran Prezidenti ilə bir həftə ərzində ikinci telefon danışığı olub.

Ukrayna Prezidenti Volodimir Zelenski isə Türkiyə Prezidenti Rəcəb Tayyib Ərdoğanla telefon danışığı aparıb.

Liderlər Türkiyə-Ukrayna ikitərəfli münasibətləri, həmçinin regional və qlobal məsələlər ətrafında fikir mübadiləsi aparıblar.

Ərdoğan söhbət zamanı İrandakı münaqişənin Ukraynada sülh axtarışlarına mane olmamalı olduğunu bildirib. O, danışıqların vaxt itirilmədən davam etdirilməsinin faydalı olacağını vurğulayıb.

Ərdoğan onu da qeyd edib ki, Qara dənizdə gəmiçiliyin təhlükəsizliyi Türkiyə üçün kritik əhəmiyyət kəsb edir. Enerji infrastrukturunun və limanların qorunmasını təmin edəcək bir atəşkəsin əldə olunmasının tərəflər arasında etimadın qurulmasına töhfə verə biləcəyini diqqətə çatdırıb.

Ərdoğan Türkiyənin bu istiqamətdə üzərinə düşən bütün dəstəyi göstərməyə hazır olduğunu deyib.