Yayılan sindromun əlamətləri | Bu, ciddi nəticələrə səbəb olur

Yaponiyada başlayan və bütün dünyaya yayılan Hikikomori sindromu fərdlərin uzun müddət sosial həyatdan uzaqlaşması və tamamilə təcrid olunması ilə xarakterizə edilir.

Xüsusilə gənc yetkinlər arasında geniş yayılmış bu vəziyyət həm fərdi, həm də sosial baxımdan ciddi nəticələrə səbəb olur.

Bu sindromun dəqiq səbəbləri tam müəyyən edilməyib. Lakin yüksək akademik və peşə gözləntiləri uğursuzluq qorxusunu artırır.

Bundan başqa, həddindən artıq qoruyucu və ya avtoritar valideyn yanaşmaları fərdin özünəinamını zəiflədə bilər.

Depressiya da bu vəziyyətin yaranma səbəbləri arasındadır. İnternet və sosial media asılılığı real həyatdan uzaqlaşmaya gətirib çıxarır. Hikikomori sindromunun əlamətləri arasında evdən çıxmamaq, dostlarla görüşməmək, internet və oyun asılılığı, virtual dünyada həddən artıq vaxt keçirmək, depressiya, ümidsizlik və qorxu hissləri, yuxusuzluq və ya həddindən artıq yatmaq, iştahsızlıq və ya normadan çox yemək var.

Hikikomori sindromunun müalicəsi zamanı sosial bacarıqları inkişaf etdirmək üçün fərdi və qrup terapiyaları tətbiq edilir, depressiyanın idarə olunması üçün dərmanlar yazılır, fərdi cəmiyyətə və iş həyatına qaytarmaq üçün xüsusi proqramlar hazırlanır.

Qeyd edək ki, Yaponiyada geniş yayılmış bu sindrom artıq Türkiyə və digər ölkələrdə də müşahidə olunmaqdadır.